1. Sjóðsaðild

Einungis félagsfólk FOSS geta fengið styrk úr sjóðnum. Réttur til úthlutunar úr sjóðnum er háður því að greitt hefur verið iðgjald til sjóðsins í að minnsta kosti 6 mánuði af síðustu 12 mánuðum.

1.1. Fæðingarorlof

Félagsfólk í fæðingarorlofi sem velur að greiða stéttarfélagsgjald meðan á orlofi stendur, viðheldur áunnum réttindum í sjóðnum yfir það tímabil sem þeir þiggja fæðingarorlofsgreiðslur frá Fæðingarorlofssjóði.

1.2. Atvinnuleysi

Félagsfólk með full réttindi við upphaf atvinnuleysis viðhalda áunnum réttindum sínum. Skilyrði er að greitt sé stéttarfélagsgjald af atvinnuleysisbótum frá upphafi atvinnuleysis.

1.3. Lífeyrir og örorka

Félagsfólk sem lætur af störfum vegna aldurs eða örorku heldur aðild að þeim hluta sjóðsins sem snýr að sjálfstyrkingu og lífsleikni námskeiðum innanlands í 24 mánuði eftir að greiðslu iðgjalda lýkur. Styrkir vegna starfstengdra námskeiða og/eða náms eru einungis í boði fyrir félagsfólk í virku ráðningasambandi.

2. Upphæð styrkja

Við ákvörðun styrkupphæðar er miðað við greidd iðgjöld í sjóðinn síðustu 12 mánuði. Til þess að njóta fullra réttinda í sjóðinn þurfa iðgjöld í sjóðinn að vera a.m.k. 25.000 kr. Hlutastarfandi er veittur styrkur í hlutfalli við innborgun iðgjalda í sjóðinn sl. 12 mánuði.

2.1. Fræðslusjóður

·         Hámarksstyrkur er 120.000 kr. miðað við fullan rétt í sjóðnum á hverjum 12 mánuðum ef félagsaðild er skemmri en 5 ár.

·         Hámarksstyrkur er 150.000 kr. miðað við fullan rétt í sjóðnum á hverjum 12 mánuðum ef félagsaðild er yfir 5 ár, eða 300.000 kr. á hverju 24 mánaða tímabili.

·         Félagsfólk sem ekki hefur nýtt sér rétt síðustu 5 ára á rétt á styrk allt að 400.000 krónur. Fyrir eitt samfellt nám/námskeið samkvæmt reglum sjóðsins.

2.2. Vísindasjóður

·         Úr Vísindasjóði er greitt að hámarki 240.000 kr. á hverjum 12 mánuðum eða 480.000 kr. á hverju 24 mánaða tímabili.
Umsækjandi sem hlotið hefur styrk úr sjóðnum á s.l. 2 árum getur að hámarki hlotið styrk sem nemur ónotuðu hlutfalli af hámarksupphæð.

3. Styrkhæf verkefni

Kostnaður umsækjanda við nám, námskeið, ráðstefnur eða sambærilega þekkingaröflun sem tengja má starfi hans og flokka má undir starfs- eða endurmenntun er styrkhæf.

Umsækjandi þarf að vera í starfi bæði þegar hann sækir um styrk og notar hann, nema styrkurinn varði endurhæfingu þar sem staða umsækjanda hefur verið lögð niður, umsækjandi veikist eða hafi orðið fyrir slysi eða ef umsækjandi lætur af störfum vegna aldurs eða örorku skv. gr. 1.3.

3.1. Hvað er styrkt?

a)      Starfstengd námskeið:

o    Styrkur getur numið allt að 120.000 kr. á 12 mánaða tímabili.

o    Námskeið þarf að falla að viðmiðum um námskeið og vera haldið af viðurkenndum fræðsluaðila.

o    Íslenskukennsla fellur undir starfstengt nám. Félagsfólk sem hafa annað móðurmál en íslensku geta sótt um endurgreiðslu vegna íslenskunáms eftir mánaðar félagsaðild. Heildarstyrkur miðast við hámarksupphæð skv. almennum reglum sjóðsins.

Ef starfstenging er óljós þarf að rökstyðja tengingu við starf.

b)      Sjálfstyrking og lífsleikni námskeið

o    Styrkur getur numið allt að 50.000 kr. á 12 mánaða tímabili, en þó er aldrei greitt meira en sem nemur 80% af námskostnaði.

o    Námskeið þarf að falla að viðmiðum um námskeið og vera haldið af viðurkenndum fræðsluaðila.

o    Einungis sjálfstyrkingar og lífsleikninámskeið sem haldin eru innanlands eru styrkhæf.

c)       Framhaldsskólanám

o    Styrkur getur numið allt að 120.000 kr. á 12 mánaða tímabili.

o    Nám til eininga.

d)      Háskólanám

o    Styrkur getur numið allt að 100.000 kr. á 12 mánaða tímabili

o    Nám til eininga.

o    Styrkir vegna skólagjalda eru ekki greiddir út fyrr en skóla önn er hafin og staðfesting frá skóla um skólavist hefur borist.

e)      Ráðstefnur innanlands

o    Styrkur er veittur vegna ráðstefnugjalds

Hægt er að sækja um styrk vegna verkefnis sem ekki tengist starfi umsækjanda fjórum sinnum á ári og fer sú úthlutun fram í febrúar, maí, ágúst og nóvember.

3.2. Hvað er ekki styrkt?

Listi þessi er ekki tæmandi upptalning.

a)       Uppihald og fæðiskostnaður.

b)      Ferðir innan borga og sveitarfélaga.

c)       Bensínkostnaður.

d)      Launatap.

e)      Námsgögn.

f)        Námskeiðskostnaður sem þegar hefur verið styrktur úr öðrum sjóði er ekki styrktur.

g)       Námskeiðskostnaður maka, barna eða aðrar nákominna er ekki styrktur.

h)      Almenn ökuréttindi.

4. Umsóknir og gögn

Sótt er um styrki rafrænt á heimasíðu FOSS.
Umsækjendur eru hvattir til að vanda frágang umsókna, með umsókn skal senda greinargóða lýsingu á því námi/námskeiði sem sótt er um styrk fyrir ásamt upplýsingum um hvernig verkefni nýtist í starfi.
Án gagna og umbeðinna upplýsinga vegna umsóknar geta sjóðfélagar átt það á hættu að afgreiðslu umsókna þeirra sé frestað eða þeim synjað vegna ófullnægjandi frágangs umsókna.

4.1. Greiðsla styrkja

Sjóðurinn áskilur sér rétt til sveigjanleika í greiðslu styrkja. Leitast verður við að greiða út styrki úr sjóðnum eins fljótt og aðstæður leyfa hverju sinni. Starfstengdir styrkir eru alla jafna greiddir út vikulega, að undanskildum júlí og ágúst mánuði en styrkir eru ekki greiddir út þá.

Styrkir sem þurfa að fara fyrir nefnd sjóðsins t.d. vafamál og/eða sjálfstyrkingar- og lífstílsnámskeið eru greiddir út eftir umfjöllun hjá nefnd sjóðsins. Forsenda greiðslu er að starfsmenn FOSS eða nefnd sjóðsins hafi samþykkt umsókn og fullnægjandi gögnum hafi verið skilað

4.2. Endurnýjun styrks

Útgreidd upphæð styrkja endurnýjast að 12 mánuðum liðnum miðað við greiðsludag hverrar umsóknar.

5.  Réttur fellur niður

5.1. Sótt um aftur í tímann

Réttur til styrkja úr sjóðnum fellur niður sé ekki sótt um styrk innan 12 mánaða frá því að til útgjalda var stofnað. Móttaka umsóknar verður því að vera innan 12 mánaða frá útgáfudegi reiknings.

5.2. Styrks ekki vitjað

Sé ekki brugðist við vilyrði um styrk og viðbótargögn og/eða upplýsingar sendar innan þriggja mánaða frá því að fyrst var óskað eftir viðbótargögnum fellur umsókn niður.

6. Önnur ákvæði

6.1. Tvígreiðsla eða ofgreiðsla styrks

Ef mistök verða við afgreiðslu styrksumsóknar eða við greiðslu styrks munu starfsmenn sjóðsins leitast við að leiðrétta þau eins og fljótt og hægt er. Félagsfólk skal tilkynna sjóðnum ef um ofgreiðslu er að ræða og endurgreiða ofgreidda upphæð þegar í stað.

6.2. Endurskoðun verklags- og úthlutunarreglna

Verklags- og úthlutunarreglur þessar skulu sæta endurskoðun í maí ár hvert út frá fjárhagsstöðu sjóðsins. Reglurnar geta tekið breytingum samkvæmt ákvörðun stjórnar og eru þær kynntar á heimasíðu félagsins.

6.3. Upplýsingar til skattyfirvalda

Námskeiðsstyrkir eru skattskyldir, en heimilt er að færa kostnað til frádráttar skv. reglum skattyfirvalda. Í byrjun hvers árs eru sendar upplýsingar til skattyfirvalda þar sem gerð er grein fyrir styrkþegum og styrkupphæðum síðastliðins árs. Félagsfólk ber ábyrgð á því að varðveita frumrit reiknings vegna þess kostnaðar sem styrkur hefur fengist fyrir til að afhenda skattyfirvöldum sé þess óskað. Félagsfólki er bent á að kynna sér reglur RSK varðandi styrki og skattafrádrátt á heimsíðu skattsins.

6.4. Stjórn, bókhald og endurskoðun reikninga

Á aðalfundi FOSS skal nefnd sjóðsins gera grein fyrir störfum sínum s.l. starfsár.
Skrifstofa FOSS sér um bókhald, innheimtir tekjur hans og innir af hendi greiðslur úr sjóðnum.
Reikningsár sjóðsins er almanaksárið og reikningar skulu endurskoðaðir af kjörnum skoðunarmönnum FOSS.